ishq ki duniya men ik hangama barpa kar diya
ai ḳhayal-e-dost ye kya ho gaya kya kar diya
zarre zarre ne mira afsana sun kar daad di
main ne vahshat men jahan ko tera shaida kar diya
tuur par rah-e-vafa men bo diye kanTe kalim
ishq ki vus.at ko masdud-e-taqaza kar diya
bistar-e-mashriq se suraj ne uThaya apna sar
kis ne ye mahfil men zikr-e-husn-e-yakta kar diya
chashm-e-nargis ja-e-shabnam ḳhuun ro.egi nadim
main ne jis din gulsitan ka raaz ifsha kar diya
qais ye meraj-e-ulfat hai ki ejaz-e-junun
najd ke har zarre ko tasvir-e-laila kar diya
mudda.a-e-dil kahun ‘ehsan’ kis ummid par
vo jo chahenge karenge aur jo chaha kar diya
Leave a Reply