Fani Badayuni
ma.al-e-soz-e-gham-ha-e-nihani dekhte jaao
bhaḌak uTThi hai sham-e-zindagani dekhte jaao
chale bhi aao vo hai qabr-e-‘fani’ dekhte jaao
tum apne marne vaale ki nishani dekhte jaao
abhi kya hai kisi din ḳhuun rula degi ye ḳhamoshi
zaban-e-hal ki jadu-bayani dekhte jaao
ghurur-e-husn ka sadqa koi jaata hai duniya se
kisi ki ḳhaak men milti javani dekhte jaao
udhar munh pher kar kya zab.h karte ho idhar dekho
miri gardan pe ḳhanjar ki ravani dekhte jaao
bahar-e-zindagi ka lutf dekha aur dekhoge
kisi ka aish-e-marg-e-na-gahani dekhte jaao
sune jaate na the tum se mire din-rat ke shikve
kafan sarkao meri be-zabani dekhte jaao
vo uTTha shor-e-matam aḳhiri didar-e-mayyat par
ab uTTha chahti hai na.ash-e-‘fani’ dekhte jaao
Leave a Reply