Syed Kashif Raza
tu mujh ko chahta hai is mughalte men rahun
kabhi karam bhi kiya kar ki aasre men rahun
jo meri soch ko gahra.iyon ki shiddat de
main zaḳhm zaḳhm kisi aise sanehe men rahun
jo meri ruuh ki barfab rut ko hiddat de
tamam umr tire qurb da.ere men rahun
jo tere qurb ke lamhon se milta-julta ho
main vaqt toḌ ke ek aise silsile men rahun
vo jo maqam hai tera miri kahani men
usi maqam pe main tere tazkire men rahun
ab is qadar to na ho intizar-e-did tira
ki muntazir tire ḳhvabon ka ratjage men rahun
sharik koi na ho jis men tera mere siva
main tujh se munsalik ik aise vaqiye men rahun
Leave a Reply