sadiyon se insan ye sunta aaya hai
dukh ki dhuup ke aage sukh ka saaya hai
ham ko in sasti khushiyon ka lobh na do
ham ne soch samajh kar gham apnaya hai
jhuut to qatil thahra is ka kya rona
sach ne bhi insan ka khuun bahaya hai
paidaish ke din se maut ki zad men hain
is maqtal men kaun hamen le aaya hai
avval avval jis dil ne barbad kiya
akhir akhir vo dil hi kaam aaya hai
itne din ehsan kiya divanon par
jitne din logon ne saath nibhaya hai