sha.iri baat nahin garm-e-suḳhan hone ki
shart hi aur hai sha.ista-e-fan hone ki
main ki har-dam mujhe balidgi-e-ruh ki fikr
ruuh ko fikr hai varasta-e-tan hone ki
ram-ba-ram silsila-e-mauj-e-ghazalan-e-ḳhayal
dasht-e-ghurbat ko basharat ho vatan hone ki
partav-e-rang se gulgun hua mamura-e-chashm
dhuum hai ku-e-tamasha ke chaman hone ki
haq-parasti ko yahan kaun hai amada-e-dar
kis ko taufiq hai be-gor-o-kafan hone ki
ya bachega na sahar tak koi darmanda-e-shab
ya sahar hi nahin ḳhakam-ba-dahan hone ki
dard ki sal-girah ḳhair se guzre ‘gauhar’
aa ga.i raat vahi chand-gahan hone ki
Leave a Reply