Arsh Siddiqui
ham ki ḳhamosh hue ahl-e-bayan dekhte hain
raaz andaz-e-takallum se ayaan dekhte hain
jan-leva hai fareb-e-rah-e-gulzar-talab
nashtar-e-shauq qarib-e-rag-e-jan dekhte hain
hai usi ghar men kahin gauhar-e-ummid nihan
su-e-virana-e-dil bahr-e-aman dekhte hain
kaise banta hai lahu surḳhi-e-afsana-e-dil
kaise banta hai qalam nok-e-sinan dekhte hain
atish-e-shauq ko rakhte hain ba-har-taur javan
ḳhak-e-gulshan men zar-e-gul ke nishan dekhte hain
ḳhashmagin aaj vo yuun hain ki nahin tab-e-suḳhan
‘arsh’ ham aaj tira zor-e-bayan dekhte hain
Leave a Reply