mujh ko marne ki koi ujlat na thi
ḳhud se milne ki koi surat na thi
dekhte kya husn ki nairangiyan
aankh jhapkane ki bhi fursat na thi
ḳhud-ba-ḳhud ye zaḳhm lau dene lage
mujh ko koi hajat-e-shohrat na thi
uTh raha hai dil se aahon ka dhuan
mahfil-e-shab mahfil-e-ishrat na thi
peḌ patte jal ke ḳhakistar hue
dosto vo barish-e-rahmat na thi
apne chehre ajnabi hote ga.e
un ki a.ankhon men koi hairat na thi
Leave a Reply