main avaam men huun lekin nahin ḳhu-e-amiyana
na amal ḳhushamdana na suḳhan ḳhushamdana
tiri aur zindagi hai miri aur zindagi hai
main bulandiyon ka juuya to asir-e-ashiyana
mujhe raas hi na aa.i kabhi na-qishon ki sohbat
mire jism-e-na-tavan men nahin ruh-e-tajirana
mire ḳhizr ke qadam hain mujhe mash.al-e-manazil
mire dida-e-talab men hai nigah-e-mujrimana
gham-o-ranj ka chhupana bhi hai kar-e-zarf lekin
hai ḳhushi ko zabt karna rah-o-rasm-e-aqilana
tiri tamkanat agar hai kisi dusre ke bal par
ye chalan hai baghiyana ye qadam hai mujrimana
mujhe ḳhizr-e-nau ki hajat nahin rah-e-bandagi men
mire maslak-e-vafa men ye ravish hai kafirana
Leave a Reply