mere haath khol diye jaaen
to main
is duniya ki divaron ko
apne khvabon ki lakiron se
siyah kar duun
aur qahr ki barish barsaun
aur is duniya ko apni hatheli par rakh kar
masal duun
mera daman khvabon ke andhere men
phaila hua hai
mere khvab phansi par chadha diye gae
mera bachcha mere pet se chhin liya gaya
mera ghar qahr-khanon ke astabal ke liye
khol diya gaya
mujhe be-zin ghode par
andhere maidanon men utaar diya gaya hai
meri zanjir ka sira kis ke paas hai?
qayamat ke shor se pahle
main apni dhajjiyon ko samet luun
apne bachchon ko akhiri baar ghiza faraham kar duun
aur zahr ka piyala pi luun
meri zanjir khol di jaae
us ka sira kis ke haath men hai?
Leave a Reply