qaail bhala hon nama-bari men saba ke khaak
phirti hai vo bhi galiyon men aksar uda ke khaak
kahta huun soz-e-dil se ki kar chuk jala ke khaak
ek baat par jo yaar ne jaani utha ke khaak
kya kanpta hai nala-e-sozan se ai falak
jab baat thi ki mujh ko kiya ho jala ke khaak
paani nikal ke dasht men jaari hai ja-ba-ja
ya-rab gaya hai kaun ye sar par uda ke khaak
daman utha utha ke jo bachta hua chala
kyuun hoven mar ke kuche men is bevafa ke khaak
rizvan abir-e-khuld se badlun na zinhar
khushbu hai kuche men vo mire mah-laqa ke khaak
‘arif’ ko yaaro ham to samajhte the ahl-e-din
dariya men log aae hain us ki baha ke khaak
Leave a Reply