raat ka apna ik taqaddus hai so use pa.emal mat karna
jab diye guftugu ke raushan hon lauTne ka saval mat karna
mausam-e-yad ka koi jhonka, ab jo guzre tumhari ḳhalvat se
soch lena hamare baare men, par hamara malal mat karna
rat-jagon ki ruten to ḳhair yunhi aati jaati hain, par ye dhyan rahe
jagna bhi to is saliqe se, apni ankhon ko laal mat karna
ham se darvesh duniya valon se, bas isi baat par ulajhte hain
vahshat-e-jism-o-jan baḌi shai hai ḳhud ko asuda-hal mat karna
dasht-e-ibrat-sara men rahna tu sar se sauda nikal kar rakhna
log dushman kahin na ho jaa.en koi aisa kamal mat karna
lamha-e-hijr apni vus.at men, aap lazzat hai, zindagi bhar ki
tum bhi ‘ḳhalid-moin’ yuun karna, umr sarf-e-visal mat karna
Leave a Reply