tarif us khuda ki jis ne jahan banaya
kaisi zamin banai kya asman banaya
paanv tale bichhaya kya khuub farsh-e-khaki
aur sar pe lajavrdi ik saeban banaya
mitti se bel-bute kya khushnuma ugaae
pahna ke sabz khilat un ko javan banaya
khush-rang aur khushbu gul phuul hain khilae
is khaak ke khandar ko kya gulistan banaya
meve lagae kya kya khush-zaeqa rasile
chakhne se jin ke mujh ko shirin-dahan banaya
suraj bana ke tu ne raunaq jahan ko bakhshi
rahne ko ye hamare achchha makan banaya
pyasi zamin ke munh men menh ka chuvaya paani
aur badalon ko tu ne menh ka nishan banaya
ye pyari pyari chidiyan phirti hain jo chahakti
qudrat ne teri un ko tasbih-khvan banaya
tinke utha utha kar lain kahan kahan se
kis khub-surati se phir ashiyan banaya
unchi uden hava men bachchon ko par na bhulen
in be-paron ka un ko rozi-rasan banaya
kya duudh dene vaali gaaen banain tu ne
chadhne ko mere ghoda kya khush-inan banaya
rahmat se teri kya kya hain nematen mayassar
in nematon ka mujh ko hai qadr-dan banaya
ab-e-ravan ke andar machhli banai tu ne
machhli ke tairne ko ab-e-ravan banaya
har chiiz se hai teri karigari tapakti
ye karkhana tu ne kab raegan banaya
Leave a Reply