abu-mohammad-sahar

Kaam Har Zakhm Ne Marham Ka Kiya Ho Jaise

kaam har zakhm ne marham ka kiya ho jaise

ab kisi se koi shikva na gila ho jaise

umr-bhar ishq ko gham-dida na rakkhe kyunkar

hadisa vo ki abhi kal hi hua ho jaise

ek muddat hui dekha tha jise pahle-pahal

tere chehre men vahi chehra chhupa ho jaise

husn ke bhed ka pa lena nahin hai asan

hai ye vo raaz ki razon men pala ho jaise

duur tak ek nigah ja ke thahar jaati hai

vaqt ka fasla kuchh DhunD raha ho jaise

yad-e-mazi se ye afsurda si raunaq dil men

akhir-e-shab koi darvaza khula ho jaise

hazl ko log ‘sahar’ aaj ghazal kahte hain

zauq-e-sheri pe bura vaqt pada ho jaise

More Poems

Leave a Comment