Adeem Hashmi
chal diya vo dekh kar pahlu miri taqsir ka
dusra rukh us ne dekha hi nahin tasvir ka
baaqi saare khat pe dhabbe ansuon ke rah gae
ek hi jumla padha main ne tiri tahrir ka
tu ne kaise lafz honton ki kaman men kas liye
itna gahra ghaav to hota nahin hai tiir ka
uzr baaqi chaal men hai qaid go baaqi nahin
paanv aadi ho gaya hai is qadar zanjir ka
aa gai kashti bhatak kar aab se su-e-sarab
bhar gaya reg-e-ravan se jaal mahi-gir ka
baat chhoti to nahin tujh se bichhadne ki hai baat
faisla taslim kar luun kis tarah taqdir ka
yaar logon ne use katba bana daala ‘adim’
akhiri patthar bacha jo umr ki taamir ka
doston se bhi taalluq ban gaya hai vo ‘adim’
jo taalluq hai kisi shamshir se shamshir ka
zahr ki ankhon men raushan suraten do hain ‘adim’
shakl ik suqrat ki aur ek chehra hiir ka
Leave a Reply