us ke lahje ka vo utaar chadhao
raat ki narm rau nadi ka bahao
us ki ankhon ke vasf kya likkhun
jaise khvabon ka be-karan thahrao
un nigahon ki guftugu men hai
niind men gum havaon ka uljhao
us badan ki nazakaten mat puchh
shisha-e-gul men chand ka lahrao
niind ki vadiyon men pichhle pahar
ek lai ek naghma ek alaao
aisi tanhai ka mudava kya
saat dariyaon men akeli naav
un labon ki vo bosa bosa uthan
aur palkon ka nashsha nashsha jhukao
us gali us dayar ki khush-bu
ai subuk-sair narm-gam havao
naujavani men maut ki khvahish
tum hi samjha sako to kuchh samjhao
jaane vo ghuncha kis chaman ka hai
jis men gum hai bahar ka phailao
raat kahti hai mujh ko pyaar se dekh
mujh men hai chashm-e-yar ka gahrao
shola-e-jan hai bujhne ko ‘javed’
aur dil men dahak raha hai alaao