tah-e-girdab to bachna mira dushvar hai phir bhi
kinare duur hain tuuti hui patvar hai phir bhi
thakan se chuur huun, sar rakh diya hai us ke siine par
mujhe maalum hai ye ret ki divar hai phir bhi
mata-e-rishta-e-jan karobar-e-manfaat kab thi
ḳharidaron ke halqe men sar-e-bazar hai phir bhi
miri mutthi men nazuk pankhudi mahfuz rahti hai
bachana sang-bari men use dushvar hai phir bhi
tire lahje ki shabnam jazb kar de kuchh nami is men
agarche dil sulagti ret ka ambar hai phir bhi
charagh-e-arzu hai muntazir dahliz par meri
vo duuri ke dhundlakon men bahut lachar hai phir bhi
samundar tishnagi ka ab sarab-e-ishq men zam hai
shikasta haal mera shisha-e-pindar hai phir bhi
ye miti chaak par thamti nahin hai, itni giili hai
kathin ye marhala hai, kuza-gar la-char hai phir bhi