dil ko ai ishq su-e-zulf-e-siyah-fam na bhej
rahzanon men tu musafir ko sar-e-sham na bhej
dekh ho jaunga ghairon ke gale ka main haar
haar phulon ke tu ai shokh-gul-andam na bhej
bhar nazar surat-e-gul dekh to len ai be-dard
haae sayyad abhi ham ko tah-e-dam na bhej
jab vo bheje hai mujhe mai to kahen hain yuun ghair
ye bahak jaega bas aur ise jaam na bhej
bhejun us paas jo qasid ko dobara to kahe
baaz aya, nahin lene ka main inaam na bhej
kucha-e-yar men pahunche hain to bas rahne de
jite-ji yaan se kahin gardish-e-ayyam na bhej
dam-ba-dam bheje hai quliyan hi ko kya munh se laga
lab se bhi lab ko mila bosa-ba-paigham na bhej
baad muddat ke tujhe paaya hai tanha ba-khuda
aaj tu kaam ko yaan se but-e-khud-kam na bhej
de kabhi bosa-e-chashm-o-lab-e-jan-bakhsh bhi jaan
sirf saughat hamen bosa-ba-paigham na bhej
galiyan to hain mohabbat ki ibarat pyare
kab main kahta huun ki likh kar mujhe dushnam na bhej
par ye dhadka hai ki jaave na kahin khat pakda
kar ke sar-name pe tahrir mira naam na bhej
‘jurat’ ab tujh se vo rutha to mana kyunki main laun
tu hi phir dene lagega mujhe ilzam na bhej
Leave a Reply