Imran Rahib
gar chahte ho farsh se aflak pe rakkho
ik baar mujhe phir se zara chaak pe rakkho
ik barf ki sil qalb-e-pareshan pe utaro
ik dasht mire dida-e-namnak pe rakkho
tum ramz-e-shahadat ke ma.ani nahin samjhe
sar nok ki sidra pe badan ḳhaak pe rakkho
lazim hai ki chabuk se tarasho mira paikar
vajib hai ki tum tursh-ravi naak pe rakkho
phir pusht pe har ḳhvab ki zanjir-zani ho
jab sham-e-ghariban miri poshak pe rakkho
yuun qais ke rutbe ki ḳhabar honi hai ‘rahib’
sahra ko agar shana-e-idrak pe rakkho
Leave a Reply