rafta rafta ḳhvahishon ko muḳhtasar karte rahe
rafta rafta zindagi ko mo’atabar karte rahe
ik ḳhata to umr bhar ham jaan kar karte rahe
fasle baḌhte ga.e phir bhi safar karte rahe
ḳhud-farebi dekhiye sham.en bujha kar raat men
ham ujalon ki tamanna ta-sahar karte rahe
ham-safar ja pahunche kab ke manzil-e-maqsud par
ham-ḳhayalon men talash-e-rahguzar karte rahe
vo bhi kuchh masruf tha ai dost kar-e-zist men
ham bhi apni ḳhvahishon ko darguzar karte rahe
purze purze karke us ne yuun diya ḳhat ka javab
muddaton tak us ka matam nama-bar karte rahe
charagar to kuchh ilaj-e-dil na kar paa.e ‘suhaib’
ham mariz-e-dil ilaj-e-charagar karte rahe
Leave a Reply