Salim Shuja Ansari
ḳhak-basta hain tah-e-ḳhak se bahar na hue
jism apne kabhi poshak se bahar na hue
jur.at-e-bazu-e-pairak se bahar na hue
ye samundar miri imlak se bahar na hue
zehn-e-ḳhufta ne hama-vaqt sa.i ki lekin
fikr ke zaviye idrak se bahar na hue
zaḳhm deti hai naya roz mujhe bhuuk miri
ye masa.ib miri ḳhurak se bahar na hue
zer-e-takmil hain dast-e-fan-e-kuza-gar men
ham vo ijad hain jo chaak se bahar na hue
shaḳh par ubhre hain tabinda gulon ki surat
jo sharare ḳhas-o-ḳhashak se bahar na hue
kaam aa.i na koi vaqt ki chara-jui
zaḳhm-e-kohna dil-e-sad-chak se bahar na hue
mahv-e-parvaz hain sadiyon se yunhi shams-o-qamar
ye parinde had-e-aflak se bahar na hue
maslahat-kosh hue vaqt ke chehre ‘salim’
aks a.ina-e-bebak se bahar na hue
Leave a Reply