Naheed Virk
us ke hisar-e-ḳhvab ko mat karb-e-zat kar
is ḳhushbu-e-ḳhayal ko tu ka.enat kar
dil kab talak juda.i ki shamen mana.ega
meri taraf kabhi to nasim-e-hayat kar
main ik tavil raste par huun khaḌi hui
ya habs-e-tirgi le ya hathon men haath kar
dhime suron men chheḌ ke phir saz-e-zindagi
tu mere lahje men bhi kabhi mujh se baat kar
vo hijraten hon, hijr ho ya qissa-e-visal
aa phir se mere naam sabhi vaqi.at kar
pairon se us ke naam ke raste lipaT ga.e
ab to yaqin ke shahr men ‘nahid’ raat kar
Leave a Reply