Hamdam Kashmiri
ham ne zahir kiya suḳhan men bahut
shor baaqi hai kyuun badan men bahut
kaun aaya hai is ḳharabe men
raushni hai kahin badan men bahut
koi avaz kyuun nahin aati
hu ka aalam hai kyuun badan men bahut
phaḌphaḌane ki aa rahi hai sada
kaun bechain hai badan men bahut
hai zamin se zamin tak parvaz
ḳhaak uThti hai pairahan men bahut
rang-o-bu hi nahin faqat abad
ḳhuun apna bhi hai chaman men bahut
maslahat hai ki buzdili ‘hamdam’
ḳhamushi aa ga.i suḳhan men bahut
Leave a Reply