Rasheed Qaisrani
sahra sahra baat chali hai nagri nagri charcha hai
raat ke gham men suraj sa.in badal oḌhe phirta hai
jhonka jhonka teri ḳhushbu mujh se lipaT kar guzri hai
reza reza teri ḳhatir main ne jism ganvaya hai
din-bhar badal chham-chham barsa shaam ko matl.a saaf hua
tab ja kar ik qaus-e-quzah par tera paikar ubhra hai
tu ne jis ki jholi men do phuul bhi hans kar Daal diye
saari umr vo kaghaz par ḳhushbu ki lakiren khinchta hai
tum kyuun tez nokile neze taan ke mujh par jhapTe ho
mera muqaddar tund bagulo yuun bhi to bujh jaana hai
main ne apne gird bana li zaḳhmon ki divar na.i
ek purana gham lekin rah rah kar mujh par hansta hai
jalte jalte main bujh ja.un ya tu agni-rup men aa
tera mera mel ho kaise main suraj tu saaya hai
sab kohsar samundar sahra ghumen us ke gird ‘rashid’
vo ik shaḳhs jo duniya-bhar men tanha tanha rahta hai
Leave a Reply