kanar-e-chashm se dekha hai ḳhauf khate hue
larazti Dolti duniya ko Duub jaate hue
kisi ne ham se na puchha hamare ḳhvab ka rang
ye rang rang ke parcham hamen thamate hue
hai shor-ḳhana-e-duniya gali ke nukkaḌ par
main kaan band hi rakhta huun ate-jate hue
koi to aa ke ḳhabar le ki bujhta jaata hai
faqir shab ke andhere men din milate hue
kabhi-kabhar saḌak par main ḳhud se milta huun
kisi ko chhoḌ ke aate kisi ko laate hue
Leave a Reply