Jahan Ara Tabassum
aksar jue ke khel men haari ga.i huun main
ghairat ke naam par bhi to maari ga.i huun main
sayyad zevaron men jakaḌta raha mujhe
pinjre men Dalne ko sanvari ga.i huun main
na-karda gunahon ki saza bhog rahi huun
sho.alon se ka.i baar guzari ga.i huun main
kyuun phir se kaTahre men bulaya gaya mujhe
kyuun phir salib par se utari ga.i huun main
hai ruuh dagh-dar mire ujle jism ki
lahje ki maar maar ke maari ga.i huun main
phir se tumhari yaad dila.i ga.i mujhe
phir se usi gali se guzari ga.i huun main
tanha.iyan tumhara pata puchhne lagin
jis din se zindagi se tumhari ga.i huun main
main asman pe chand sitaron ki saf men thi
tere liye zamin pe utari ga.i huun main
tum ne jo muskura ke ‘tabassum’ kaha mujhe
tum par tumhare naam pe vaari ga.i huun main
Leave a Reply