abdul-hafiz-naeemi

Gard-e-Firaq Ghaza Kash-e-Aina Na Ho

gard-e-firaq ghaza kash-e-aina na ho

chaho jo tum to apne tasarruf men kya na ho

sajde ke har nishan pe hai khuun sa jama hua

yaaro ye us ke ghar ka kahin rasta na ho

zakhmon ki mishalen liye guzra hai dil se kaun

yadon ka koi bhatka hua qafila na ho

kab se khada huun ek do-rahe pe but bana

sab kuchh jo dekhta ho magar bolta na ho

chumo lagao ankhon se sar par rakkho use

ye zindagi varaq kisi injil ka na ho

sau baar ik gali men mujhe le gaya ye vahm

khidki se koi maslahatan jhankta na ho

sharma gae the donon hi pahli nazar ke baad

shayad tumhen to yaad bhi vo vaqia na ho

laao na mere samne aariz ke aftab

chehre pe koi harf-e-tamanna likha na ho

maazi ke reg-zar pe rakhna sambhal ke paanv

bachchon ka is men koi gharaunda bana na ho

ho kar juda bhi us se ‘naimi’ main ji to luun

lekin ye Dar hai is se kahin vo khafa na ho

More Poems

Leave a Comment