Ab KHun Ko Mai Qalb Ko Paimana Kaha Jae

Malikzaada Manzoor Ahmad

ab ḳhuun ko mai qalb ko paimana kaha jaa.e

is daur men maqtal ko bhi mai-ḳhana kaha jaa.e

jo baat kahi jaa.e vo tevar se kahi jaa.e

jo sher kaha jaa.e harifana kaha jaa.e

har honT ko murjhaya hua phuul samajhiye

har aankh ko chhalka hua paimana kaha jaa.e

sunsan hue jaate hain ḳhvabon ke jazire

ḳhvabon ke jaziron ko bhi virana kaha jaa.e

vaa.iz ne jo farmaya tha mehrab-e-haram men

rindon se vo kyuun saqi-e-mai-ḳhana kaha jaa.e

tapte hue sahra men bhi kuchh phuul khila.en

kab tak lab-o-ruḳhsar ka afsana kaha jaa.e

ham sub.h-e-baharan ki tamazat se jale hain

ham se gul o shabnam ka na afsana kaha jaa.e

divana har ik haal men divana rahega

farzana kaha jaa.e ki divana kaha jaa.e

maḳhdum se ham ko bhi hai nisbat vahi ‘manzur’

rindon men jise nisbat-e-paimana kaha jaa.e