hai aaTh pahar tu jalva-numa timsal-e-nazar hai partav-e-ruḳh
aariz hai qamar ḳhurshid jabin shab-e-zulf-e-sahar hai partav-e-ruḳh
a.ankhon men hua hai ghar tera dil kahta hai rakh har dam parda
ho chashm-e-tamanna kyuun kar va ashiq ki nazar hai partav-e-ruḳh
jab madd-e-nazar aghyar the vaan tarik tha yaan a.ankhon men jahan
raushan hai charagh-e-ruh-e-ravan kya aaj idhar hai partav-e-ruḳh
ki fikr magar baa.is na khula ai lala-ruḳh-e-be-mehr-o-vafa
batla to ye dil ka dard hai kya gar dagh-e-jigar hai partav-e-ruḳh
ghash koi kisi ko hai sakta hai nur-e-ḳhuda tera jalva
ho daḳhl tire ghar men kis ka yaan hajib-e-dar hai partav-e-ruḳh
uTh ashiq-e-muztar sajde kar aa.i hai shab-e-maqsad ki sahar
vo dekhte hain ghurfe se idhar ai ḳhak-basar hai partav-e-ruḳh
shohra hai bahar-e-ariz ka bulbul ki tarah ashiq hain fida
hai bagh-e-javani ruh-afza barg-e-gul-e-tar hai partav-e-ruḳh
jis se ho aansu ḳhun-e-jigar ban jaa.e aqiq-o-la.al-o-guhar
ḳhurshid-o-qamar aur sim-o-zar ai jaan magar hai partav-e-ruḳh
betab ‘habib’-e-muztar hai hairan kabhi gah shashdar hai
phirta hai gul-e-ḳhurshid-sifat munh us ka jidhar hai partav-e-ruḳh
Leave a Reply