Sultan Akhtar
sab ka chehra pas-e-divar-e-ana rahta hai
a.ine se yahan har shaḳhs ḳhafa rahta hai
phir bhi ham log vahan jiite hain jiine ki tarah
mausam-e-qahr jahan Thahra hua rahta hai
us ke aane ki ab ummid nahin hai raushan
phir bhi darvaza-e-dil hai ki khula rahta hai
rang-e-tabir chamakta hi nahin ankhon men
raat bhar ḳhvab ka bazar saja rahta hai
bas usi aks se ḳha.if hai har ik shaḳhs yahan
a.ina-ḳhane men jo chehra-numa rahta hai
ḳhana-e-dil pe hukumat hai usi ki ‘aḳhtar’
ye alag baat ki vo mujh se ḳhafa rahta hai
Leave a Reply