kuchh nahin samjha huun itna muḳhtasar paigham tha
kya hava thi jis hava ke haath par paigham tha
us ko aana tha ki vo mujh ko bulata tha kahin
raat bhar barish thi us ka raat bhar paigham tha
lene vaala hi koi baaqi nahin tha shahr men
varna to us shaam koi dar-ba-dar paigham tha
muntazir thi jaise ḳhud hi tinka tinka aarzu
ḳhar-o-ḳhas ke vaste goya sharar paigham tha
kya musafir the ki the ranj-e-safar se be-niyaz
aane jaane ke liye ik rah-guzar paigham tha
koi kaghaz ek maile se lifafe men tha band
khol kar dekha to us men sar-ba-sar paigham tha
har qadam par raston ke rang the bikhre hue
chalne valon ke liye apna safar paigham tha
kuchh sifat us men parindon aur patton ki bhi thi
kitni shadabi thi aur kaisa shajar paigham tha
aur to laaya na tha paigham saath apne ‘zafar’
jo bhi tha us ka yahi aib o hunar paigham tha
Leave a Reply