Kuchh Nahin Samjha Hun Itna muKHtasar Paigham Tha

kuchh nahīñ samjhā huuñ itnā muḳhtasar paiġhām thā

kyā havā thī jis havā ke haath par paiġhām thā

us ko aanā thā ki vo mujh ko bulātā thā kahīñ

raat bhar bārish thī us kā raat bhar paiġhām thā

lene vaalā hī koī baaqī nahīñ thā shahr meñ

varna to us shaam koī dar-ba-dar paiġhām thā

muntazir thī jaise ḳhud hī tinkā tinkā aarzū

ḳhār-o-ḳhas ke vāste goyā sharar paiġhām thā

kyā musāfir the ki the ranj-e-safar se be-niyāz

aane jaane ke liye ik rah-guzar paiġhām thā

koī kāġhaz ek maile se lifāfe meñ thā band

khol kar dekhā to us meñ sar-ba-sar paiġhām thā

har qadam par rāstoñ ke rañg the bikhre hue

chalne vāloñ ke liye apnā safar paiġhām thā

kuchh sifat us meñ parindoñ aur pattoñ kī bhī thī

kitnī shādābī thī aur kaisā shajar paiġhām thā

aur to laayā na thā paiġhām saath apne ‘zafar’

jo bhī thā us kā yahī aib o hunar paiġhām thā

Leave a Comment