main us ki baat ke lahje ka e’tibar karun
karun ki us ka na main aaj intizar karun
main sirf saaya huun apna magar ye zid hai mujhe
ki apne-ap ko khud se alag shumar karun
ajab mizaj hai us ka bhi chahta hai ki main
ba-taur-e-vaza faqat khud ko ikhtiyar karun
main ik athah samundar huun is khayal men gharq
ki duub jaun main khud men ki khud ko paar karun
khud apne-ap se milne ke vaste pahle
main apne-ap ko dariya se abshar karun
main us ki dhuup huun jo mera aftab nahin
ye baat khud pe main kis tarah ashkar karun
kisi qadim kahani men ek muddat se
vo so raha hai ki main us ko hoshiyar karun
phir ek aas ki chilman se umr bhar lag ke
khud apne paanv ki aahat ka intizar karun