Daniyal Tareer
shahr se kya ga.i janib-e-dasht-ezar zindagi faḳhta
bain karne lagi aa ke sham-o-sahar matami faḳhta
mar gaya raat ko barf oḌhe hue ek fōtpath par
vo jo kahta raha lafz vo umr-bhar shanti faḳhta
kaisi kaisi hava.en chalin baagh men kaun aaya gaya
saari tabdiliyon se rahi be-ḳhabar bavri faḳhta
vo nagar chand ka hai vahan teri kirnon ki ḳhvahish kise
is taraf tirgi hai yahan la ke dhar tashtari faḳhta
be-aman shahr men kaisi dahshat se guzri thi main kya kahun
jab adu dekhti apne hi bal-o-par nochti faḳhta
vo jo ankhon men thi koi duniya alag thi jahan se juda
mere ḳhvabon men the amn ka rahbar raushni faḳhta
main tha sha.ir mujhe shahr-ashob likhne the likhta raha
teri qismat men likhe ga.e kyuun khanDar sundari faḳhta
Leave a Reply