Sajid Hameed
zamin ki aankh ḳhali hai dinon ba.ad
falak par ḳhushk-sali hai dinon ba.ad
sajane ḳhaak ka bistar lahu ne
alag kya rah nikali hai dinon ba.ad
kahin chashm-e-jabin phir khul na jaa.e
ki dasht-e-dil jalali hai dinon ba.ad
samajh men vaqt ka aaya karishma
nazar ḳhud par jo Daali hai dinon ba.ad
kaha us ne bil-aḳhir muskura kar
tiri duniya nirali hai dinon ba.ad
ajab ik kashmakash si andarun hai
ziya bhi kaali kaali hai dinon ba.ad
koi majnun magar aata nahin hai
mira sahra savali hai dinon ba.ad
ḳhuda rakkhe tujhe abad ‘sajid’
ghazal tu ne bana li hai dinon ba.ad
Leave a Reply