kishwar-naheed

Hausla Shart-E-Wafa Kya Karna

hausla shart-e-vafa kya karna

band mutthi men hava kya karna

jab koi sunta na ho bolna kya

qabr men shor bapa kya karna

qahr hai lutf ki surat abad

apni ankhon ko bhi va kya karna

dard thahrega vafa ki manzil

aks shishe se juda kya karna

dil ke zindan men hai aram bahut

vusat-e-dasht-numa kya karna

sham-e-kushta ki tarah ji liije

dam ghute bhi to gila kya karna

mere pichhe mira saaya hoga

pichhe mud kar bhi bhala kya karna

kuchh karo yuun ki zamana dekhe

shor galiyon men sada kya karna

More Poems

Leave a Comment