Jaleel Aali
jism ke ḳhol se niklun to qaza ko dekhun
but ko raste se haTa.un to ḳhuda ko dekhun
aisa kya jurm hua hai ki taḌapte marte
apne ehsas ki suuli pe ana ko dekhun
bolti aankh ka ras hanste hue lafz ka ruup
baat nazron ki sunun ya ki sada ko dekhun
in ki qismat ki khilen roz tamanna ke gulab
meri taqdir ki zaḳhmon ki chita ko dekhun
is tavaqqo pe ki shayad koi darvesh mile
ghaur se shahar ke ek ek gada ko dekhun
mujh ko tahzib ke maktab ne sikhaya hai yahi
taḳhti-e-dil na paḌhun rang-e-qaba ko dekhun
Leave a Reply