na harf-e-shauq na tarz-e-bayan se aati hai
supurdagi ki sada jism-o-jan se aati hai
koi sitara rag-o-pai men hai samaya hua
mujhe ḳhud apni ḳhabar asman se aati hai
kisi dukan se milti nahin hai garmi-e-shauq
ye aanch vo hai jo soz-e-nihan se aati hai
khula nahin hai vo mujh par kisi bhi pahlu se
nahin ki guunj abhi us ki haan se aati hai
ajiib shai hai nashat-e-yaqin ki daulat bhi
kisi vajud ke vahm-o-guman se aati hai
parinde shaam Dhale raah men nahin rukte
koi naved unhen ashiyan se aati hai
miThas gholta hai kaun mere lahje men
mire suḳhan men halavat kahan se aati hai
gurez bhi kahin iz.har-e-arzu hi na ho
kashish ye kaisi badan ki kaman se aati hai
kisi hijab ki bandish ko manti hi nahin
jo mauj ruuh ki ju-e-ravan se aati hai
Leave a Reply