na.i zamin naya asman talash karo
jo sat.h-e-ab pe ho vo makan talash karo
nagar men dhuup ki tezi jala.e deti hai
nagar se duur koi sa.eban talash karo
ThiThur gaya hai badan sab ka barf-bari se
dahakta kholta atish-fishan talash karo
har ek lafz ke ma.ani bahut hi uthle hain
ik aisa lafz jo ho be-karan talash karo
bahut dinon se koi hadisa nahin guzra
kisi ke taaza lahu ka nishan talash karo
har ek ke raaz se vaqif ho kah rahe hain sabhi
mire badan men koi dastan talash karo
Leave a Reply