Farhat Ehsas
aaya zara si der raha ghul gaya badan
apni uḌaa.i ḳhaak men hi rul gaya badan
ḳhvahish thi abshar-e-mohabbat men ghusl ki
halki si ik phuvar men hi ghul gaya badan
zer-e-kaman dil tha to thoḌi si thi umiid
ab to hamare haath se bilkul gaya badan
ab dekhta huun main to vo asbab hi nahin
lagta hai raste men kahin khul gaya badan
main ne bhi ek din use taraj kar diya
mujh ko halak karne pe jab tul gaya badan
Leave a Reply