Hayat Amrohvi
vo dil nahin raha vo tabi.at nahin rahi
shayad ab un ko mujh se mohabbat nahin rahi
ghabra raha huun kyon ye gham-e-narava se ab
kya mujh men gham ke sahne ki taqat nahin rahi
tum kya badal ga.e ki zamana badal gaya
taskin-e-dil ki ab koi surat nahin rahi
jiine ko ji rahe hain tumhare baghair bhi
is tarah jaise jiine ki hasrat nahin rahi
shayad koi hasin idhar se guzar gaya
vo dard-e-dil ki pahli si halat nahin rahi
jaage ho raat mahfil-e-aghyar men zarur
ankhon men ab vo kufr ki zulmat nahin rahi
jab kar diya ḳhizan ne vo rangin chaman tabah
vo husn ab kahan vo malahat nahin rahi
zahid men hai na zohd na rindon men mai-kashi
phulon men husn ghunchon men rangat nahin rahi
haan ai ‘hayat’ ham ne zamane ke dukh sahe
phir bhi hamen kisi se shikayat nahin rahi
Leave a Reply