Niyaz Husain Lakhwera
ruk ruk ke kabhi muḌ ke tujhe dekh raha huun
main teri juda.i se bahut ḳhauf-zada huun
us shaḳhs se milne ki jasarat hi nahin ki
ḳhvabon ke dariche se jise jhank raha huun
main tundi-e-halat se ḳha.if nahin hota
ai ḳhak-nashino main bagulon men pala huun
duuri ki koi lahr na le jaa.e baha kar
chahat ke samundar men safar kar to raha huun
ik samt andhera hai to ik samt kaḌi dhuup
halat ke ik aise dorahe pe khaḌa huun
har samt na.e dukh ke samundar ki sada hai
main tark-e-ta.alluq ke jazire pe khaḌa huun
tum qat-e-marasim pe ho amada to kya hai
ye zahr to ik umr se main chaaT raha huun
aa.egi mire jism se iḳhlas ki ḳhushbu
main phuul huun aur pyaar ki Tahni pe saja huun
Leave a Reply