Tafzeel Ahmad
shahr ko choT pe rakhti hai gajar men koi chiiz
billiyan DhunDhti rahti hain khanDar men koi chiiz
chaak hain zaḳhm ke paani men hava men nasur
muTThiyan tol ke nikli hai safar men koi chiiz
barha ankhen ghani karta huun us pe phir bhi
chhuT rahti hai nigah se gul-e-tar men koi chiiz
kabhi baiThak se rasoi kabhi dalan se chhat
bavli phirti hai tujh bin mire ghar men koi chiiz
zindagi aag pe leTi hui parchha.in hai kya
bas dhuan deti hai har vaqt jigar men koi chiiz
shahr-e-sani men shajar-kari na ki danista
phir nikal aa.e kahin barg-o-samar men koi chiiz
hashr tak jiiti rahengi miri ghazlen ‘tafzil’
oxigen si labalab hai hunar men koi chiiz
Leave a Reply