musalsal aag men ik aag si lagi hui hai
ye main jo raakh bani hai to raushni hui hai
ruka nahin kisi manzil pe karvan-e-safar
azal se ḳhuun men tahrik si chali hui hai
ḳhamir-e-tuḳhm men rakkhi hui hasin ḳhvahish
gulab ban ke har ik shaḳh par khili hui hai
paḌa huun jism ke sanche men hijr apna liye
mujhe ye umr kahin DhunDne ga.i hui hai
fasil-o-dar mujhe hairat se takte rahte hain
kisi dariche se kya meri dosti hui hai
ye surḳh-o-taza gulon se bhari hui Tahni
mire badan ka lahu pi ke hi baḌi hui hai
Leave a Reply