zidon ko apni tarasho aur un ko ḳhvab karo
phir us ke ba.ad hi manzil ka intiḳhab karo
mohabbaton men na.e qarz chaḌhte rahte hain
magar ye kis ne kaha hai kabhi hisab karo
tumhen ye duniya kabhi phuul to nahin degi
mile hain kanTe to kanTon ko hi gulab karo
siyah raato chamakti nahin hai yuun taqdir
uThao apne charaghon ko mahtab karo
ka.i sada.en Thikana talash karti hui
faza men guunj rahi hain unhen kitab karo
kisi ke rang men Dhalna hi hai agar ‘danish’
to apne aap ko thoḌa bahut ḳharab karo
Leave a Reply