Guzra Apna Pas-E-Murdan Hi Sahi

guzra apna pas-e-murdan hi sahi

kucha-e-yar men madfan hi sahi

khair jo rang nahin hai to na ho

tegh khincho miri gardan hi sahi

qabr-e-bulbul pe chalun rone ko

aaj gulzar men shevan hi sahi

but to vallah bana lenge kabhi

shor-e-naqus barahman hi sahi

josh-e-vahshat hai dila najd ko chal

sair karne ke liye ban hi sahi

shama to yaar chadhata hi nahin

dagh-e-dil qabr men raushan hi sahi

haal kuchh mire gareban men nahin

ai junun dasht ka daman hi sahi

koi ham-chashm to ho zindan men

hairati dida-e-rauzan hi sahi

missi malida dahan men hai kalam

bosa-ha-e-ghuncha-e-sausan hi sahi

naseha us ki burai to na kar

na sahi dost vo dushman hi sahi

gul-rukhon se to hui qata umiid

‘mehr’ nazzara-e-gulshan hi sahi

Leave a Comment