zaḳhm dil par laga nahin hota
haal aisa hua nahin hota
zikr-e-janan hua nahin hota
zaḳhm-e-dil phir hara nahin hota
chain se zindagi basar hoti
rog dil ka laga nahin hota
kuchh na kuchh baat ho ga.i varna
dilruba bevafa nahin hota
uns iḳhlas aur vafadari
dil men sha.ir ke kya nahin hota
dasht-o-sahra men gar nahin phirte
paanv men aabla nahin hota
tum se shikva hai bevafa.i ka
sab se to ye gila nahin hota
zulm baḌhta hai roz zalim ka
ḳhatm ye silsila nahin hota
chaar ankhen nahin hui hotin
pyaar ka hadisa nahin hota
yaad aati na ham ko janan ki
jaam gham ka bhara nahin hota
adl ke beach koi haa.il hai
kyon koi faisla nahin hota
kahkashan chand titliyan jugnu
zikr-e-janan men kya nahin hota
rab ko be-shak pukarte hain ham
jab koi aasra nahin hota
haar jaata huun main ana se ‘zaki’
sar ye kyon ma.arka nahin hota
Leave a Reply