Bahr-E-Hasti Se Bhi Ji Ghabra Gaya

bahr-e-hastī se bhī jī ghabrā gayā

be-kasī bas ab kinārā aa gayā

kam huā karte haiñ aise ḳhush-nasīb

tujh pe mar kar jin ko jiinā aa gayā

merā miT jaanā tamāshā thā koī

aap se ye kis tarah dekhā gayā

dukh bure dil kī kahānī kuchh na pūchh

phuul ke hañsne pe ronā aa gayā

sub.h karnā shām-e-ġham kā al-amāñ

sham.a ko dāñtoñ pasīna aa gayā

ḳhush raho tum chal basā bīmār-e-ġham

umr-bhar kī uljhaneñ suljhā gayā

rāh-e-ulfat meñ hai marnā zindagī

dard manzil tak mujhe pahuñchā gayā

mausam-e-gul bhī hai āñkhoñ meñ ḳhizāñ

dil hī kyā baiThā chaman murjhā gayā

vo hue kyā aañkh se ‘ārif’ nihāñ

saarī duniyā meñ añdherā chhā gayā

Leave a Comment