haan mira haal hai barbad magar main to nahin
tujh ko karta hai koi yaad magar main to nahin
barha ḳhaliq-e-kaunain tiri ḳhidmat men
pahunchi hogi miri fariyad magar main to nahin
ahd-e-hazir men lage misr ke bazaron men
bik ga.i hai miri rudad magar main to nahin
kaash hasti bhi miri daad ke qabil hoti
sher lete hain mire daad magar main to nahin
mohtaram log mujhe fan ke sabab jante hain
mohtaram hain mire ustad magar main to nahin
dast-e-haidar se ghulami ki sanad jin ko mili
honge vo hazrat-e-miqdad magar main to nahin
saal ke saath badalna nahin aata ‘kazim’
haan badal jaate hain a.adad magar main to nahin
Leave a Reply