apne ham-rah jala rakkha hai
taq-e-dil par jo diya rakkha hai
jumbish-e-lab na sahi tere ḳhilaf
haath ko ham ne uTha rakkha hai
tu mujhe chhoḌ ke ja sakta nahin
chhoḌ is baat men kya rakkha hai
vo mila dega hamen bhi jis ne
aab aur gil ko mila rakkha hai
mujh ko malum hai meri ḳhatir
kahin ik jaal buna rakkha hai
janta huun mire qissa-go ne
asl qisse ko chhupa rakkha hai
asmanon ne gavahi ke liye
ik sitare ko bacha rakkha hai
kaam kuchh itne hain karne ko ‘jamal’
naam ko kal pe uTha rakkha hai
Leave a Reply