ai maut tujh pe umr-e-abad ka madar hai
tu e’tibar-e-hasti-e-be-e’tibar hai
ahd-e-azal pe zindagiyon ka madar hai
aalam tamam gham-kada-e-e’tibar hai
zarrat-e-chashm-e-shauq hain amada-e-nigah
mahrumiyon ko ab bhi tira intizar hai
bedad ka gila to karun aur jo vo kahen
ye kahiye imtihan-e-vafa nagavar hai
ik ye vafa ki nang-e-gham-e-dost hai hunuz
ik vo sitam ki husn ka a.ina-dar hai
tamiz-e-husn-o-ishq na irfan-e-gham magar
ik tir-e-be-panah kaleje ke paar hai
muḳhtar huun ki mo’tarif-e-jabr-e-dost huun
majbur huun ki ye bhi koi iḳhtiyar hai
ab kis ko e’tibar ki tu bevafa nahin
ab kis ko intizar magar intizar hai
baaqi nahin kisi ko nashat-e-junun ka hosh
kis josh par shabab-e-gham-e-rozgar hai
adab-e-ashiqi ka taqaza hai aur baat
tu varna dil ki aaḌ men ḳhud be-qarar hai
hogi kisi ko fursat-e-nazzara-e-jamal
‘fani’ ḳharab-e-husn tamasha-e-yar hai
Leave a Reply