Navneet Sharma
hue hain phir se andheron ke hausle raushan
qalam sambhal andhere ko jo likhe raushan
ye sukhi jhilen thiin in men kahan se aa.i baaḌh
hamari ankhon men hain kis ke tajrabe raushan
ye aur baat hava ne bujha diye kaafi
tumhari yaad ke lekin hain kuchh diye raushan
tumhen chamakna hai to likkho ham ko safhon par
hamare hone se hote hain hashiye raushan
udaas shaam hai aur saare bench ḳhali hain
koi zamana tha hote the qahqahe raushan
zara si der ko saaye men un ke aaya tha
yaqin jaano hue saare zaviye raushan
mire qarib koi ḳhvab kaise aa paata
ki mujh men rahte hain barson se ratjage raushan
ab un pe dhund qayamat ki dhund taari hai
tumhare saath jo hote the marhale raushan
haqiqatan use dekha kahan hai muddat se
hain jis ki diid ke ḳhvabon men vaqiye raushan
gire jo yaad ki jacket pe yaad ke phahe
andhere dil men hue ḳhuub valvale raushan
kiya muaaf jo ik dusre se duur rahe
qarib aa.e, hue saare fasle raushan
main tirgi sahi lekin kabhi kabhi mujh men
huzur koi to pahlu nikaliye raushan
Leave a Reply